Í vetur hafa nemendur og starfsmenn Brúarskóla unnið að því að útbúa útikennslustofu í grenndarskóginum okkar. Vinnan fór rólega af stað í haust og vetur en nú á vordögum er allt á fullu. Nemendur hafa hreinsað til á svæðinu, klippt greinar, merkt gönguleiðir, borið grjót í útigrill o.s.frv. Stefnt er að því að vígja útikennslustofuna með athöfn nú á vordögum.

Nú á vordögum gaf unglingadeildin í Brúarskóla út skólablað, Brúarmonitor. Í blaðinu má finna viðtöl við nemendur og starfsfólk, myndir af skólastarfinu og margt annað skemmtilegt. Unglingarnir eiga hrós skilið fyrir flott og skemmtilegt blað. Blaðið má nálgast á rafrænu formi hér.

Þriðjudagurinn 1. maí er Verkalýðsdagurinn og því engin kennsla þann dag. 

Nú í vikunni fóru nemendur á miðstigi í Brúarskóla á skólatónleika hjá Sinfóníuhljómsveit Íslands í Hörpunni. Tónleikarnir báru yfirskriftina Úti í náttúrunni og voru leikin nokkur lög sem öll tengjast náttúrunni, s.s. vorið úr Árstíðum Vivaldis, Býfluga Rimskíj-Korsakovs og Moldá eftir Smetana. Halldóra Geirharðsdóttir leikkona var kynnir og sagði áheyrendum frá verkunum, um hvað þau fjölluðu og eftir hverju þeir ættu að hlusta.

Nemendur og starfsmenn skemmtu sér vel og nutu tilbreytingarinnar frá hefðbundnum skóladegi.